அடிக்கடி எல்லோரும் சந்திக்கிறோம் தானே
அடிக்கடி எல்லோரும் பிரிகின்றோம் தானே
எதுக்கடி எல்லோரும் சிந்திக்க மறக்கிறாங்க...
வாழ்வில் பலரைச் சந்திக்கின்றோம் தானே
சந்தித்த பலரும் பிரிகின்றோம் தானே
பிரிந்த பின்னராவது சிந்திக்கின்றோமா?
விபத்துப் போலச் சந்தித்தோம் தானே
சந்திப்புகள் தொடராமலே பிரிந்தோம் தானே
பிரிவுகள் உறுத்தினாலும் சிந்தித்தோமா?
எதிர்பாராமலே எல்லோரும் சந்திக்கிறோம் தானே
எதிர்பார்ப்புகள் ஈடேறாமலே பிரிகின்றோம் தானே
பிரிவுகளால் பாதிப்புறச் சிந்திக்கின்றோமா?
முன்பின் அறியாமலே சந்தித்தோம் தானே
முழுமையாகப் பழகாமலே பிரிந்தோம் தானே
பிரிவையும் இழப்பாகச் சிந்தித்தோமா?
தவிர்க்கமுடியாத சந்திப்பும் இயல்பு தானே
எதிர்பார்க்காத பிரிவும் இயல்பு தானே
சந்திப்பும் பிரிவும் சிந்திக்க வைக்கிறதா?
நேற்றைய சந்திப்பும் நாளையும் தொடரும் தானே
நாளைய பிரிவும் நம்பாமலே நிகழும் தானே
இன்றைய சொல்லும் செயலும் தானே சான்று!
என்றும் சந்திப்போம் என்றும் பிரிவோம் தானே
நன்றே சிந்தித்தால் பிரிவும் நிகழாது தானே
என்றும் சிந்தனையும் செயலும் உதவும் தானே!
கைக்கெட்டிய வாழ்வில் பிரிவையும் சந்திப்போம் தானே
பிரிகின்ற வேளையில் இழப்பையும் சந்திப்போம் தானே
பிரிவையும் இழப்பையும் தவிர்க்க நன்றே சிந்திப்போம்!
கருத்துகள் இல்லை :
கருத்துரையிடுக
வருக அறிஞர்களே! தருக தங்கள் கருத்துகளையே!