யார் மூளை சாலிகள்?

 

"உனக்கு நல்ல எதிர்காலம் இருக்கு!

நன்றாகப் படித்து உழைத்தால்

மகிழ்ச்சியாகப் பிழைத்துக் கொள்வாய்!" என்று 

அம்மா, அப்பா, ஆசிரியர் என

எல்லோரும் 

அடிக்கடி சொல்லி நினைவூட்டினர்!

மாதா, பிதா, குரு தெய்வமென

அவர்கள் சொல் கேட்டு 

பின்பற்றிய எல்லோரும் 

பெரிய பெரிய புள்ளிகளாக

மின்னுவதைக் காணலாம்!

எவர் சொல்லும் கேளாமல் 

என் வழி தனி வழி என 

பயணித்த எல்லோருமே

சிறு புள்ளியாக 

எங்கோ ஒரு மூலையில் 

முடங்கி இருப்பதைக் காணலாம்!

சுற்றுச் சூழலைப் பார்த்தாவது

குறை, குற்றம் சொல்லாமல்

தங்களைத் தாங்களே

திருத்திக் கொள்வது மூளைசாலிகளே!

காதலும் ஒரு மருந்து

 

அன்பாகப் பழகி ஏமாற்றும் 

ஆள்கள் தான்! அதிகம் தான்!! 

அப்படியிருக்கையில் 

அன்பாகப் பழகினால் காதலிப்பது 

அரை முட்டாள் செயலே!

கண்டதே கோலம் கொண்டதே காதல் 

என்றலைவதும் 

முழு முட்டாள் செயலே!

பொழுது போக்குவதற்கு 

புத்தகங்கள், பத்திரிகைகளைப் படித்தால் 

அறிவாளி ஆகலாம் - மறந்தும் 

காதலிக்க முயன்றால்

தூக்குக் கயிறே துணைக்கு வரும்!

வெளித் தோற்றத்தில் மயங்கி  

ஒருவரைப் பற்றிய - முழுமையான 

உண்மை நிலை அறியாமல் 

காதலிக்க முனைவது

சாவை நாடிச் சாவைத் தாவென்று

தலையை நீட்டியதாகவே இருக்கும்!

அ ... ஔ வரை ஆய்வு செய்து 

உண்மை சொல்வாரா

பழகினால் நம்பிக்கை வருகிறதா

இறப்பு வரை துணை நிற்பரா

என்றெல்லாம் சோதித்து 

ஏற்ற வாழ்க்கைத் துணை என்றறிந்தே

காதலிக்க விரும்பலாம்!

திருமணமாகிய இணையர் 

இறப்பு வரை பிரியாது இருக்க

இறுக அணைத்து வைத்திருப்பது

காதல் என்ற மருந்தே!

ஆக்கம்:  யாழ்ப்பாவாணன்

நிறைவு தரும் வாசிப்பு, உள/மன நோய்க்கு மருந்து

 

ஏன் மாற்றார் பொத்தகத்தைப் படிக்க (வாசிக்க) வேண்டும்.

வாய்ப் பேச்சில் உறுதியான தகவல் வெளிப்படுத்துவது சிக்கல் இருக்கலாம். எழுத்துப் பிரதியில் நிதானமாக வாசகரின் எதிர்வினைக்குப் பயந்து உறுதியான தகவலை வெளிப்படுத்த வாய்ப்பிருப்பதால் புத்தகங்களை வாசித்தால் பயனுண்டு.

அதற்காக மாற்றார் பொத்தகத்தை ஏன் படிக்க வேண்டும்?

ஒவ்வொருவரின் தேடலும் ஒவ்வொரு சூழலில் இருந்து தான் எழுகிறது. அதன்படிக்கு அவர்களது அறுவடைகளின் வெளிப்பாடாக ஒவ்வொரு நுட்பங்களும் தேடல்  சார்ந்த பின்புலத்தையொட்டி இருக்கக்கூடும். அதனால் மாற்றார் பொத்தகங்களில் அதாவது ஒவ்வொரு எழுத்து ஆசிரியரின் பொத்தகங்களில் ஒவ்வொரு தேடலைக் கண்டுகளிக்க முடியும்.

அறிவுப் பசி, அறிவுத் தேடல் உள்ளவருக்கு மாற்றார் பொத்தகங்களை வாசிக்க அவரவர் உள்ளம் தூண்டும். அதனால் தான் அதிகமானோர் பொத்தகங்களை வாசிக்கின்றனர். வாசிப்பு உள்ளத்தில் நிறைவைத் தரும் போது உள(மன) நோய்கள் எம்மை விட்டு ஓடிவிடும். எனவே, ஆகக் குறைந்தது ஔவையாரின் நீதி நூல்களையாவது வாசிக்க விரும்புங்கள்.

ஐப்பசி (அக்டோபர்) மாதம் வாசிப்பு மாதம் என்றவாறு வாசிப்பைத் தூண்டும் வகையில் பொத்தகக் கண்காட்சிகள் இடம்பெறுகிறது. இது தங்கள் சிந்தனைக்கு.

தலை குனிந்து
என்னை வாசித்துப் (படித்துப்) பார்
அறிவைப் பொறுக்கலாம்...
பொறுக்கிய அறிவை வைத்து
நீ
உலகெங்கும் தலை நிமிர்ந்து
நடைபோடலாம் என்கிறது
பொத்தகம்!
கல்விக்கூடம்/பள்ளிக்கூடம் போய்
படித்தவரைப் போன்றே
புத்தகம் வாசித்துப் படித்தவரும்
அறிவாளி என்கின்றனர் - எங்கட
அப்பு, ஆச்சிமார்!
வாசிப்பது - எமது
சுவாசம் போன்று எண்ணிப்பார்!

பிறப்பு, இறப்பு, மறுபிறப்பு

 

பிறப்பும் இறப்பும் 

ஆண்டவன் கையில் தான் இருக்கு!

எப்படிப் பிறந்தோம்

எப்போது பிறந்தோம்

என்றறியாமல் தான் வாழ்கிறோம்!

இறப்பு ஒன்று இருக்கு - அது 

எப்போது நிகழும் 

என்றறியாமல் தான் வாழ்கிறோம்!

விரைவாய் இறந்து விடுவோமென்று நினைப்பதும் 

துன்பப்படும் வேளை கூட

துன்பம் தாங்க முடியாமல் 

இறந்து விட்டால் மேலென்று நினைப்பதும்

ஒருபோதும் இடம்பெறாது - அது 

ஆண்டவன் குறித்த நாளில் தான் 

நடக்கும் காணும்!

நான் இறந்து விட்டால் 

மறுபிறப்பு ஒன்று இருந்துவிட்டால்

பூச்சியாய், புழுவாய், பறவையாய்,

பாம்பாய், மிருகமாய், மரமாய்

பிறப்பேனா இல்லையேல் - மீண்டும் 

மனிதப் பிறவி கிட்டுமா 

என்றெல்லாம் நினைத்தால் - அதுவும் 

ஆண்டவன் கையில் தான் இருக்கு!

பிறப்புக்கும் இறப்புக்கும இடையே

இடம்பெறும் வாழ்கை மட்டுமே 

எங்கள் கையில் இருக்கு - அதனை

நன்றாகச் சுவைத்து வாழ்ந்திட

பிறப்பு, இறப்பு, மறுபிறப்பு எதனையும் 

தலையில போட்டு உடைக்காமல் வாழ்ந்திடு!

வாழ்வா சாவா

சமகாலத்தில் சாவு அதிகரித்து விட்டது.
வாழ்வைப் பற்றிச் சிந்திக்க மறந்து
சாவை நாடிச் செல்வது மனிதரா
மனிதரின் வாழ்வைப் பறிப்பது சாவா
கண்டு பிடிக்க முடியவில்லையே!
(வசன/வரிக் கவிதை)

சாவை விரட்டுவதும் கூட
வாழ்வதற்கான போராட்டம் தான்!
வாழ்க்கையே போராட்டம் என்று
சாவை நாடுவதும் கூட
தவறான கண்ணோட்டம் தான்!
(புதுக் கவிதை)

சாவைத் தான் நீதழுவப் போனாயா
சாவேதான் உன்னையே நாடியதா
எண்ணிப் பாருன் வாழ்வைத் தானே!
(நேரிசை ஆசிரியப்பா)

மனிதரா சாவைத்தான் தேடியே செல்கிறார்
சாவு மனிரையே நாடி வருகிறதா
யாருக்குத் தான்தெரியும் சொல்லு.
(பல விகற்ப இன்னிசைச் சிந்தியல் வெண்பா)

வாழ்வை உதறியே சாவையே நாடுவதா
வாழ்ந்துதான் பாருங்கள் நன்று.
(ஒரு விகற்பக் குறள் வெண்பா)

ஆக்கம்: யாழ்ப்பாவாணன் (மாதகல்வாசி காசி.ஜீவலிங்கம்)